НИТХ-аар хотын төвийн явган хүний замыг шинэчлэх ажлын төсвийн тал хувийг гэр хорооллын зам, талбай, үерийн далангийн байгууламж барих ажилд зарцуулахаар болжээ. 

Уг саналыг НИТХ-ын Хүн намын бүлэг гаргасан бөгөөд зам шинэчлэх ажлын төсөв нь 45.6 тэрбум төгрөг аж. Энэхүү төсвийн 22.8 тэрбум төгрөг гэр хорооллын орчинд тэр дундаа үерийн далангийн байгууламжийн ажилд зарцуулагдахаар болж байна. 

Улаанбаатар хотод гол, шар ус болон уруйн үер гэсэн гурван төрлийн үерийн эрсдэл бий. Найман байршилд голын үер, гурван байршилд шар усны, 75 байршилд уруйн үер болох эрсдэлтэй. Дээрх 75 байршлаас хүн ам төвлөрсөн, эрсдэл өндөртэй нь 20 байршил байгаа бөгөөд эдгээрт ус зайлуулах далан суваг байгуулах шаардлагатай гэсэн мэргэжлийн байгууллагын судалгаа бий.