2024 оны элсэлтийн шалгалт эхэлж буй талаар Боловсролын үнэлгээний төвийн дарга Д.Ганбат мэдээллээ.

БШУ-ны сайдын 2024 оны хоёрдугаар сарын 16-ны өдрийн А/66 дугаар тушаалаар батлагдсан “Элсэлтийн шалгалтын журам”-ын дагуу ЭШ-ын бүртгэл 2024 оны хоёрдугаар сарын 19-ны 09.00 цагт эхэлж 2024 оны дөрөвдүгээр сарын 26-ны 18 цагт дуусна.

Монгол хэл, бичгийн шалгалтын бүртгэл 2024 оны гуравсарын 15-ны өдрийн 18.00 цагт дуусна.

Шалгуулагч бүр зөвхөн өөрийн и-мэйл хаягаар бүртгүүлэх ба eec.mn  /eyesh.eec.mn/ цахим хаяг руу хандан бүртгэлээ хийхдээ дараах материалыг бэлтгэсэн байна.

Үүнд:
1. Иргэний үнэмлэх болон түүнтэй адилтгах баримт бичиг /иргэний үнэмлэхийн   лавлагаа, гадаад паспорт, цагдаагийн үнэмлэх, мөн гадаадын иргэний Монгол Улсад оршин суух түр үнэмлэх /
2. Өнгөт цээж зураг /цээж зураг нь 3*4 хэмжээтэй, сүүлийн 3 сарын дотор авхуулсан, урагшаа цэх харсан, арын фон нь цайвар цулгуй өнгийн, нарны шил болон малгайгүй байна/
3. Бүх банкны интернэт гүйлгээ хийх эрхтэй төлбөрийн карт

МХБШ нь үнэ төлбөргүй бөгөөд ЭШ-ын нэг хичээлийн бүртгэлийн хураамж 5,800 төгрөг байна. Хөгжлийн бэрхшээлтэй иргэн болон тусгай сургуулийн суралцагч элсэлтийн шалгалт өгөхөөр бүртгүүлсэн бол холбогдох бичиг баримтыг бүртгэлийн хугацаанд БҮТ-д ирүүлнэ.

• Өргөдөл хүсэлт
• Эмчийн магадалгаа
• Сургуулийн тодорхойлолт

Элсэлтийн шалгалтын дүн оноог олон улсын дүн оноотой дүйцүүлэх аргачлалд нарийвчилсан өөрчлөлт нэлээн орсон. Өөрөөр хэлбэл Кембрижийн олон улсын шалгалтууд, PTE, TOEFL, SAT, IELTS зэрэг шалгалтыг өгсөн хүүхдүүд тэрхүү оноогоо дүйцүүлж дотоодын их дээд сургуульд элсэн орох боломжтой. Мөн дүйцүүлэх хүсэлтийг онлайнаар буюу 3.01-05.31 хүртэл БҮТ-ийн сайтаар хүлээн аван, 10 хоногийн хугацаанд багтаан Батламж хуудсыг олгоно.

Элсэлтийн шалгалтын ерөнхий агуулга, бүтэц, зохион байгуулалт нь 2026 оноос эхлэн өөрчлөгдөнө. Тиймээс энэ жил 10 дугаар ангид сурч байгаа сурагч хүүхдүүд энэ талаарх мэдээллийг сайн авах шаардлагатай.

Орох өөрчлөлтүүд:

• Суралцах чадварын шалгалт
• Ур чадварын шалгалт
• Судлагдахууны хоёр түвшинд дараах шалгалтыг өгнө

- Англи хэл - 1
- Англи хэлний ОУ шалгалт -  PEIC
- Математик - 1,2
- Монгол хэл - 1,2
- Орос хэл - 2
- Байгалийн ухаан - 1,2,3
- Нийгмийн ухаан - 1,2,3 гэсэн түвшинтэй, тестийн хэлбэртэй байна

Мөн үндэсний босго оноо 400 байх юм.

ЭЕШ өгөх шалгуулагч ЭНД дарж бүртгүүлэх боломжтой.