Сэлэнгэ аймгийн Мандал сумын Түнхэл тосгонд өнгөрөгч оны долоодугаар сарын 13-нд найман настай охин моринд чирэгдэж хүнд гэмтсэн осол гарч байсан. Охины гэмтэл хүнд газраар тээвэрлэх боломжгүй байсан тул ОБЕГ-ын харьяа Агаараас эрэн хайх, аврах ангийн алба хаагчид ЕС-145 загварын МТ-1111 агаарын хөлгөөр нислэг үйлдэж, Гэмтэл согог судлалын үндэсний төвд хүргэж, хүлээлгэн өгч байсан. 

Хүнд гэмтэж хөл дээрээ эргээд босох эсэх нь тодорхой бус байсан охин зургаан удаагийн хагалгаанд орж, эрчимтэй эмчилгээ хийлгэсний хүчинд эрүүл саруул болсон байна. Хүнд хэцүү цаг үед охиныг агаараар тээвэрлэн эмнэлгийн тусламжийг түргэн үзүүлж, чадварлаг эмч нарын ачаар охин эрүүл саруул болжээ. Охин ээж, ахын хамт баярласан сэтгэгдэлээ илэрхийлэхээр Агаараас эрэн хайх, аврах 111 дүгээр ангид хүрэлцэн ирж, нислэгийн экипажийн бүрэлдэхүүний хамт олонтой уулзаж, үйл ажиллагаатай нь танилцсан байна.