Автомашины улсын дугаарын тэгш, сондгойгоор хөдөлгөөнд оролцуулах дугаарын хязгаарлалт маргаашаас эхлэн үйлчлэхгүй болсон талаар нийслэлийн холбогдох албан тушаалтнууд мэдээлэл өглөө.

Өнгөрөгч оны  арванхоёрдугаар сарын 18-наас нэгдүгээр сарыг дуустал автомашиныг улсын дугаарын тэгш, сондгойгоор замын хөдөлгөөнд оролцуулах зохицуулалт хийсэн. Холбогдох байгууллагуудаас уг захирамжийн хугацааг сунгах хүсэлт ирүүлсний дагуу www.ulaanbaatar.mn, https://vote.ulaanbaatar.mn/home цахим хуудсаар иргэдээс санал авсан юм. Саналыг нэгдүгээр сарын 29-нөөс эхлэн ажлын гурван өдөр авсан бөгөөд санал өгсөн 8,000 гаруй иргэний 56 хувь нь сунгахыг дэмжээгүй тул уг шийдвэрийг цуцалж байна. 

Тэгш, сондгой дугаарын хязгаарлалт дуусаж маргаашаас хуучин зохицуулалт үйлчилнэ.   

• 1, 6-гаар төгссөн дугаартай машинууд Даваа гарагт
• 2, 7-гоор төгссөн дугаартай бол Мягмар гарагт
• 3, 8-аар төгссөн дугаартай бол Лхагва гарагт
• 4, 9-өөр төгссөн дугаартай бол Пүрэв гарагт
• 5, 0-ээр төгссөн дугаартай бол Баасан гарагт замын хөдөлгөөнд оролцохгүй