Улсын хэмжээнд энэ оны нэгдүгээр сарын 25-ны өдрийн байдлаар согтуурсан, мансуурсан үедээ тээврийн хэрэгсэл жолоодож замын хөдөлгөөнд оролцсон 1156 зөрчил гарчээ. Эдгээр зөрчлүүдээс өмнө согтуугаар тээврийн хэрэгсэл жолоодож эрхээ хасуулсан 167 иргэн дахин согтуугаар тээврийн хэрэгсэл жолоодож эрүүгийн журмаар шалгуулж байгаа гэнэ. 

Жолооны эрхээ хасуулсан хүн согтуугаар тээврийн хэрэгсэл жолоодсон тохиолдлын 77.2 хувь нь орон нутагт бүртгэгдсэн байна.

Согтуугаар тээврийн хэрэгсэл жолоодсон 675 иргэнд Зөрчлийн тухай хуульд зааснаар шийтгэл оногдуулсан байна. Зөрчил гаргасан иргэдийн тээврийн хэрэгсэл жолоодох эрхийг нэг жилийн хугацаагаар хасаж, 585 хүнийг 400.000 төгрөгөөр торгосон бол 193 хүнийг 7-30 хоногоор баривчилсан байна.