Улаанбаатарын утаа униараас хэсэгхэн ч болов холдож цэвэр агаарт, дотнын хүмүүстэйгээ өдөржин гулгаж буй улаа бутарсан хацартаа, жаргалтай инээмсэглэл тодруулсан хүмүүс Скай Ресорт баазад “Мазаалай” өвлийн наадамд цуглажээ. Гурван ес тачигнаж буй хэдий ч хүүхэд, томчуудын эерүү уур амьсгалд бүчигдэн гадаа нэг л дулаахан байх аж.

Илүү том мөсөн гулгуураас гулгаж буйдаа баярлаж байна гэж багачууд, ховордож буй амьтныг цас, мөсөөр бүтээсэн нь онцгой сонин байгаагаас гадна цэвэр агаарт хүүхдүүдтэйгээ цагийг жаргалтай өнгөрүүлж буйдаа талархалтай байгаагаа томчууд хэлж байлаа.

Манай улс “МАЗААЛАЙ” олон улсын мөсний баярын нээлтээ, Геннисийн шинэ амжилттай хамтатган өчигдөр нээсэн. Өвлийн аялал жуулчлалыг хөгжүүлэх зорилготой энэ баярын онцлох үйл явдал нь олон улсын мөсөн урлалын тэмцээн байв.

Монголд анх удаа олон улсын чанартай зохиож буй энэ тэмцээнд нийт 7 орны 12 баг “Мазаалайг хайрлая” уриан дор бүтээлээ урлаж байна. Оролцож буй улсууд:

• ОХУ
• Якут
• Хятад
• Тайланд
• АНУ
• Франц
• Монгол

“Мазаалай” мөсний баяр нэгдүгээр сарын 14-17-ны хооронд үргэлжлэх юм.