Эквадор улсын хамгийн онц ноцтой гэмт хэрэгтнүүдийн нэгд тооцогддог этгээд шоронгоос оргосны дараа тус улсын Ерөнхийлөгч орон даяар 60 өдрийн онц байдал зарлажээ.

Тодруулбал “Лос Чонерос” гэмт хэргийн бүлэглэлийн толгойлогч Адольфо Макиас 34 жилийн хорих ялаар шийтгүүлж, шоронд хоригдож байсан ч даваа гарагт оргосон байна.

Энэ нь ердөө хоёр сарын өмнө ажлаа аваад буй Даниел Нобоа Ерөнхийлөгчид хүндхэн асуудал болов. Учир нь тэрбээр онц ноцтой гэмт этгээдүүдтэй тэмцэж, улс орныхоо эдийн засгийг сайжруулна хэмээн амлалт өгсөн. 

Түүний хэлснээр онц байдал зарлах нь цэрэг, цагдаагийн албаныханд улсын хэмжээнд бүх шоронгуудад хяналт тавих боломж олгох аж.  

Макиасын хоригдож байсан шорон нь таван хорих анги, 12 мянга гаруй хоригдолтой том шоронгуудын нэг бөгөөд тэрбээр сүүлийн 12 жилийн турш хоригдсон байна. 

Гэмт этгээд 2013 онд мөн шоронгоос оргосон бөгөөд дөрвөн сарын дараа түүнийг олж байжээ. 

Эх сурвалж: Reuters