Улсын төсвийн хуулийг жил бүрийн арваннэгдүгээр сард Засгийн газраас УИХ-д өргөн барьж батлуулдаг. Энэ оны төсөв сонгуулийн жилийн төсөв тул төсвийн орлого зардал өссөнд гайхах хэрэггүй. Төсвийн орлогоо 25 их наяд, зарлагаа 28 их наяд буюу манай улсын түүхэд байгаагүй өндөр дүнгээр төсөөлсөн хуулийг эрх баригчид баталсан. Үүнийг эдийн засагчид мөрөөдлийн тоо тавьж, түүндээ хүрэхгүй болохоор зээл авч, алдагдалд хүрдэг хэмээн шүүмжилсэн. Энэ оны улсын төсөвтэй холбоотой онцлох мэдээллүүд:

• Улаанбаатараас гадна зургаан аймаг л төсөвт орлого оруулна. Өмнөговь аймаг хамгийн өндөр буюу 719 тэрбум төгрөгийн орлого оруулна.
• Ирэх онд Ерөнхий сайдад 340 тэрбум төгрөг хуваарилсан нь зарим яамны төсвөөс илүү байна
• Эрчим хүчний салбарт нэг их наяд гаруй, барилга, хот байгуулалтын салбарт 750 тэрбум, зам барьж байгуулахад хоёр их наяд төгрөгийг тус тус төсөвлөжээ.  
• “Оюутолгой”-гоос 760 тэрбум төгрөг орж ирнэ.
• 2024 онд экспортлох нүүрсний биет хэмжээг 60 сая тоннд хүргэнэ.
• Засгийн газрын нийт өрийг 5.1 их наяд төгрөгөөр нэмж, 44 их наяд төгрөг байхаар төсөөлжээ.