Ардчилсан намын Нарийн бичгийн дарга Энхпүрэв: Монгол Улсын нийт 3.5 сая иргэнд боловсролын асуудал хамааралтай. Бидний хувьд болохгүй, бүтэхгүй байгаа тэр болгон боловсролын чанарын асуудал, хүний хөгжилтэй шууд хамааралтай юм. Өнгөрсөн жилүүдэд гаднын олон хөтөлбөрийг туршсаар ирсэн боловч бид өөрсдөдөө таарсан боловсролын системийг бий болгож чадахгүй байна. Хөгжингүй улсуудтай хэрхэн эн тэнцүү суралцах, хөгжих боломжийг эрэлхийлсээр ирсэн. Монгол хүүхдүүдийн биеэ даасан, монгол хүний амьдрахуйд суурилсан чадварыг олгох нь монголын боловсролын салбарт хийх шинэчлэл юм. Бид боловсролын салбарын бодлогыг том зургаар нь харж байна.

Ардчилсан намын Нарийн бичгийн дарга Н.Гансүх: Ардчилсан нам баруун төвийн үзэл баримтлалтай хүний эрх, эрх чөлөөг дээдэлдэг тэр дундаа иргэн өмчтэй байхыг нь хуулиар хамгаалдаг бизнес эрхлэгчдийг дэмждэг ийм нам юм. Ардчилсан нам залуучуудын нам болж шинэчлэгдэж байна. Өнгөрсөн 33 жилийн хугацаанд Ардчилсан намд төр барих, бодлогоо хэрэгжүүлэх боломж хомс байлаа. Эдийн засгийн болон, хөгжлийн бодлогын баримт бичиг багадаагүй боловч хэрэгжилт, хяналт дээр үгүй болсон. Өнөөдөр ардчилсан хувьсгалтай чацуу залуучууд аль хэзээний 2, 3 хүүхдийн аав, ээж болчихсон явж байна.

Гэтэл бидний амьдрал, ахуй дээшилсэн, улс орон хөгжсөн зүйл алга. Нэг хүнд ногдох ДНБ 5000 доллар хүрэхгүй байна. Нийт бүртгэлтэй 210 гаруй мянган ААН-ийн 95 мянга гаруй нь л идэвхтэй үйл ажиллагаа явуулж байна.

Төрийн ямар ч дэмжлэггүйгээр чөлөөт өрсөлдөөнт эдийн засгийг бий болгож өгөөч ээ гэдгийг хэлмээр байна. Өнөөдөр монгол хүн ажилтай, орлоготой байх шаардлагатай байна.

Ардчилсан намын залуус өөрчлөлт, бодлогын реформыг хийнэ гэдэгтээ итгэлтэй байна. Бид илүү нээлттэй нам болж бодлогоо хэрэгжүүлэх болно.

 

Ардчилсан намын Нарийн бичгийн дарга Б.Булганбаатар: Өнөөдөр залуучууд ажил хийгээд олсон орлогоороо хангалттай амьдрах боломж алга. Нэг өрөө байрны түрээсийн зардал ажил хийгээд авч байгаа цалин нь хүрэлцэхгүй хэмжээнд байна. Манай улсын нийт хүн амын 30 хувь нь залуучууд байна. Бүгд найрамдахчуудын олон улсын хүрээлэнгийн судалгааны үр дүнгээс харахад залуучуудын хамгийн тулгамдсан асуудал нь ажилгүйдэл, авлигал болсон байна. Энэхүү судалгааны үр дүнг харахад 1 сая төгрөгийн цалингаар хэдэн төгрөгөөр нь байр түрээсэлж хэрэглээгээ хангах вэ, мөн үнийн өсөлт маш өндөр түшинд хүрсэн байна. Эдгээр асуудлууд нь залуучуудын амьдрах орчныг үгүй хийж байна. Залуучууд гадагшаа явахыг хүсэж байна. Залуучуудад тулгамдаж буй бодит асуудлууд бол боловсрол, эрүүл мэнд, орчны асуудлууд юм. Эдгээр нь залуусыг амьдрах, хөгжих боломжийг үгүй хийсээр байна.