Японы төвийн бүсийн нутгаар өчигдөр үдээс хойш 7.5 магнитудын хүчтэй газар хөдлөлт болж, барилгууд нурж, гал түймэр гарсан ба цунамигийн аюулын дохиог Оросын зүүн хэсэг хүртэл хүргэж, Японы далайн эргийн бүс нутгийн оршин суугчдыг нүүлгэн шилжүүлэхийг анхааруулсан байна.

Газар хөдлөлт даваа гарагийн 16:10 цагт болсон ба газар хөдлөлтийн улмаас Ишикава мужид зургаан хүн амиа алдаж, Тояама, Нийгата зэрэг дөрвөн мужид олон арван хүн бэртэж гэмтсэн гэж Японы олон нийтийн NHK телевиз мэдээлэв.

Мөн Японы цаг уурын агентлаг баруун хэсгийн далайн эргийн бүс нутгаар яаралтай “Цунамигийн сэрэмжлүүлэг” гаргасан бөгөөд эхний давалгаа төд удалгүй 10 гаруй минутын дараа далайн эрэгт хүрсэн гэж мэдээлсэн.

Ишикава мужийн Важима хотоос ирсэн эхний мэдээллээр 1.2 метр (3.9 фут) өндөр цунамигийн давалгаа 16:21 цагийн орчимд ажиглагдсан гэж NHK мэдээлэв. Одоогоор хохирол учраагүй байна.

Батлан ​​хамгаалах яам 1000 цэргийн албан хаагчийг аврах, сэргээн босгох ажилд илгээсэн гэж Батлан ​​хамгаалахын сайд Минору Кихара даваа гарагт сэтгүүлчдэд мэдэгдэв.

Японы цаг уурын агентлаг 2011 онд болсон Нотогийн аймшигт газар хөдлөлтөөс хойш анх удаа "цунамигийн томоохон сэрэмжлүүлэг" өгсөн боловч дараа нь "цунамигийн сэрэмжлүүлэг" болгон бууруулжээ.

Цунамигийн давалгааны аюул багассан тул цунамигийн сэрэмжлүүлгийг цуцалсан боловч 1 метр (3 фут) хүртэл давалгааны тухай сэрэмжлүүлэг үргэлжилсээр байна.

Японы цунамигаас сэрэмжлүүлэх системийн дагуу 1 метрээс бага долгион нь "цунамигийн зөвлөгөө", 3 метр хүртэлх долгион нь "цунамигийн сэрэмжлүүлэг", 5 метрээс дээш өндөртэй давалгаа "цунамигийн томоохон сэрэмжлүүлэг"-ийн ангилалд багтдаг.

Хокурику цахилгаан эрчим хүчний компанийн мэдээлснээр, Ишикава мужид газар хөдлөлтийн улмаас 32500 гаруй байшин цахилгаангүй болсон байна.

Японы цаг уурын агентлаг хүчтэй газар хөдлөлт ойрын гурав хоногоос долоо хоног хүртэл үргэлжилж болзошгүйг анхааруулж, барилга нурах, хөрсний гулгалт үүсэхээс сэрэмжлүүлэв.

Японы Ерөнхий сайд Фумио Кишида хэлэхдээ, эрх баригчид нөлөөлөлд өртсөн бүс нутагт учирч болзошгүй хохирлыг тооцохоор ажиллаж байна гэжээ.

Өмнөд Солонгосын цаг уурын алба зүүн эргийн Гангнунг, Ян Ян, Ганвон мужийн Госон, Пухан хотын нутаг дэвсгэрт далайн түвшин өөрчлөгдөж болзошгүйг ажиглаж байна гэж мэдэгдэв.

Оросын зүүн хэсгийн Владивосток, Находка хотууд болон Сахалин аралд мөн Японы баруун эрэг рүү чиглэсэн бүс нутгууд цунамигийн аюул зарласан гэж Оросын төрийн мэдээллийн ТАСС мэдээлэв. Одоогоор нүүлгэн шилжүүлэлт гараагүй байна.

Эх сурвалж: CNN

Бэлтгэсэн: З.Батзаяа