1911 оны цагаагчин гахай жилийн өвлийн дунд сарын шинийн есөн буюу аргын тооллын 1911 оны 12 сарын 29-нд Монгол Улсын түүхэнд 200 гаруй жил үргэлжилсэн Манж Чин гүрний ноёрхлыг эцэс болгон Монголчууд үндэсний тусгаар тогтнолоо зарлаж 8-р Богдыг Монгол улсын шашин төрийг хослон баригч, хэмжээгүй эрхт хаанд өргөмжилж байжээ. 

Мөн таван яамтай Засгийн газрыг байгуулах шийдвэрийг гарган, тусгаар тогтносон Богд хаант Монгол улсыг байгуулсан юм. Энэхүү Үндэсний эрх чөлөөний хувьсгал монголчуудын тусгаар улсаа сэргээн байгуулах гэсэн олон арван жилийн тууштай тэмцлийн биелэл, үндэсний их сэргэлтийн эхлэл, 1921 оны Ардын хувьсгалын бодит хөрс болсон билээ.

Соцализмын он жилүүдэд энэхүү түүхэн өдрийн үнэ цэнийг ойшоолгүй ирсэн 2007 оны 8 сарын 16-ны УИХ-ын тогтоолоор жил бүрийн 12-р сарын 29-ийг нийтээр тэмдэглэх тэмдэглэлт өдөр болгож, улмаар 2011 оны 12 сарын 23 өдрийн хуулиар Үндэсний эрх чөлөө, тусгаар тогтнолоо сэргээсний баярын өдөр хэмээн нийтээр тэмдэглэх баярын өдөр болгохоор хуульчилсан байдаг.