УОК-ын Шуурхай штабаас Дундговь аймгийн Онцгой комиссын гишүүдтэй цахим хурал хийж, өвөлжилтийн нөхцөл байдлын мэдээлэлтэй танилцлаа. Өнгөрсөн арваннэгдүгээр сард ихэнх нутгийг хамарч 4-9 хоног олон жилийн дунджаас ахиу цас орж, цасан шуурга шуурсан нь зам даваа хаагдах, бэлчээрийн өвс ургамал цасанд дарагдах, улмаар мал бэлчих боломжгүйд хүрсэн байна.

Аймгийн хэмжээнд нийт нутгийн 48 орчим хувьд их, 42 хувьд нь дунд зэрэг эрсдэлтэй байгаа бол 10 хувьд бага эрсдэлтэй гарчээ. Өлзийт, Хулд, Өндөршил, Эрдэнэдалай зүүн тал, Луусын хойд тал, Сайнцагааны урд талын нутгаар илүү зудын эрсдэл өндөр гарсан байна.  Орон нутгийн төсөв, малчдын хувь хөрөнгөөр  Дэлгэрхангай, Дэрэн, Дэлгэрцогт, Өлзийт, Сайнцагаан, Эрдэнэдалай, Баянжаргалан найман суманд 44 энгийн уурхайн худгийг сэргээн засварлаж, бэлчээр усжуулалтыг нэмэгдүүлсэн байна.