Нийслэлд оройн цагаар зарим газруудаар эрчим хүч тасалдах болсон талаар  Эрчим хүчний сайд Б.Чойжилсүрэнгээс сэтгүүлчид тодрууллаа. 

Тэрээр "Уржигдар оргил ачааллын цагаар төвийн эрчим хүчний системийн хэрэглээ 1,618 МВт болсон. Тэр үед хэрэглэгч дунд тодорхой хэмжээний хязгаарлалт хийсэн. Энэ нь манай хэрэглээ өсөж байгаагаас шалтгаалж байна. Хүйтэн болж байгаагаас системд гэмтэл гарах тохиолдол бий. 

ОХУ нийлүүлэх хэмжээгээрээ буюу 345 МВт-аа нийлүүлж байгаа. Тэгээд ч хүрэлцэхгүй байна гэсэн үг. -30 градусаас дээш хүйтрэх үед салхин цахилгаан станцын нийлүүлэх хэмжээ нь багасаж байгаа. Салхин цахилгаан станц оргил ачааллын үед хэр оролцоотой байхаас шалтгаалаад хязгаарлагдах эсэх нь яригдах тул урьдчилан таамаглах боломжгүй. Хэрэв хязгаарлах шаардлага гарвал хэрэглэгч нарыг ангилан зургаан багц гаргасан. Нэг эсвэл хоёр долоо хоногт нэг удаа хязгаарлана. Тэнцвэртэй хуваарилж, аль болох хүндрэл, хөлдөлт үүсгэхгүй байхад анхаарна. Хязгаарлалтыг гурван цагаас хэтрүүлэхгүй" гэлээ.  

Зарим газруудад цахилгаан тасарч байгаа нь хязгаарлалтай холбоотой мөн цахилгааны тоноглолууд дээр гэмтэл гарч байгаа учраас тасалдах шалтгаан болж байгааг салбарын сайд хэллээ.