Улсын Их Хурал дахь Ардчилсан Намын бүлэг цаг үеийн асуудалтай холбоотойгоор мэдээлэл өглөө. 

УИХ-ын гишүүн Н.ГАНИБАЛ: 
- Өнгөрсөн долоо хоногийн бүлгийн хурлаараа Ардчилсан Нам Ж.Ганбаатар сайдыг огцруулах асуудлыг ярьсан. Тухайн үед Ж.Ганбаатар сайд дөрөв хоногийн дотор шатахууны нийлүүлэлтийг хэвийн болгоно гэж амласан. Харамсалтай нь өнөөдрийг хүртэл хэвийн болсонгүй. Шатахууны асуудал дээр салбар хариуцсан сайдын буруу мэдээллээс болж маш олон иргэд хохирсон. Намаржаанаас өвөлжөө рүүгээ шилждэг цаг үед түлшний хомсдолоос болоод өвөлжөөндөө бууж чадалгүй шуурганы улмаас хүний амь эрстсэн тохиолдлууд ч бий. 

Мөн түлшний хомсдлоос болоод уул уурхайн бүтээгдэхүүний тээвэрлэлт тасалдах аюул тулгараад байна. Уг нь  Ж.Ганбаатар сайд иргэддээ үнэнийг хэлж, зөв зохион байгуулсан бол асуудал иймдээ тулахгүй байсан. Гэвч салбарын сайдын буруу зөрүү мэдээллээс болж Засгийн газраа ч хуурсан, ард иргэдийг ч хуурсан учраас нөхцөл байдал хүндэрч байна.

Сүүлдээ Улаанбаатар хотоос гарч байгаа товчоогоор гарах машинуудыг шатахуунтай эсэхийг нь хянах хүртлээ ядуурсан төрийн бодлого явуулж байгаа учраас энэ хүнийг яаралтай огцруулах шаардлагыг АН-ын бүлгээс тавьж, Ерөнхий сайдад өгсөн. Цаашид хэрхэхийг мэдээллээд явна.