БНСУ, АНУ, Японы үндэсний аюулгүй байдлын зөвлөхүүд Хойд Солонгосын цөмийн болон пуужингийн заналхийллийн эсрэг хамтын ажиллагаагаа бэхжүүлэхийн зэрэгцээ нийлүүлэлтийн сүлжээ, технологийн хамгаалалт болон эдийн засгийн аюулгүй байдлын асуудлаар хамтын ажиллагаагаа гүнзгийрүүлнэ гэж мэдэгдлээ.

Тодруулбал, БНСУ-ын Үндэсний аюулгүй байдлын зөвлөх Чо Тэ Ён, АНУ-ын Үндэсний аюулгүй байдлын зөвлөх Жейк Салливан, Японы Үндэсний аюулгүй байдлын зөвлөлийн ерөнхий нарийн бичгийн дарга Такео Акиба нар гурван талт хэлэлцээ хийсний дараа хийсэн хамтарсан хэвлэлийн бага хурлын үеэр энэ шийдвэрийг танилцуулав.

Өнгөрсөн наймдугаар сард АНУ-ын Кэмп Дэвид-д БНСУ-ын ерөнхийлөгч Юн Сук Ёол, АНУ-ын Ерөнхийлөгч Жо Байден, Японы Ерөнхий сайд Кишида Фүмио нар уулзаж, дээрх асуудлыг хөндсөн. Тиймээс энэ удаагийн уулзалт ч гурван талын хамтын ажиллагааг бэхжүүлэхээс гадна Хойд Солонгосын эсрэг эрчтэй арга хэмжээ авахаар шийдсэнийг харуулж байна гэж шинжээчид дүгнэж байна.