Нүүрсний нээлттэй сонсгол  “Эрдэнэс Тавантолгой” ХК-ийн нүүрс олборлолт, бараа, ажил, үйлчилгээ худалдан авалтын үйл ажиллагаатай холбоотой  асуудлаар үргэлжилж байна. Эрдэнэс тавантолгойн ХК-ийн асуудлаар цагдан хоригдож байгаа Б.Ганхуягийг нээлттэй сонсголд оролцуулах түр хорооны шийдвэр гарсан ч түүнийг оролцуулах боломжгүй шүүхийн шийдвэр гарсаныг Хууль зүйн сайд Б.Энхбаяр танилцуулсан. 

УИХ-ын гишүүн С.Ганбаатар: Тендертэй холбоотой асуудал дээр Б.Ганхуягийг гэрчээр оролцуулах хэрэгтэй. Өнөөдрийн асуудал дээр бид тааж ярих гээд байна. Ямар шүүгч нь данхайгаад томроод байгаа юм. Сайд дарга нарын захиалга гэж баймааргүй юм. Биеэр ирүүлэхгүй ч гэсэн цахимаар өөрийгөө илэрхийлэх боломжийг хангаж өгөөчээ гэж Хууль зүйн сайдаас хүсэж байна гэв. 

Түүний хүсэлтийн хариуд Хууль зүйн сайд Б.Энхбаяр: С.Ганбаатар гишүүн та өөрөө түр хорооны шийдвэрийг бариад шүүх дээр очоод Б.Ганхуягийг гэрчээр оролцуулах хүсэлтийг дахин тавьж явахыг хүсэв. 

Түүний ар гэрийн зүгээс нүүрсний нээлттэй сонсголд гэрчээр оролцуулах хүсэлтийг нь танилцуулж мөн хордлогод байгаа талаар мэдээллийг сайдад танилцуулав. Б.Ганхуягийг хордуулсан асуудлын талаар Хууль зүйн сайд Б.Энхбаяр Эрүүгийн цагдаагийн газарт хүсэлт тавьж шалгуулж байгаа гэх мэдээллийг ар гэрийнхэнд нь өгсөн юм.