Бутан улсын ерөнхий сайдын хэвлэлийн албанаас энэ сарын эхээр гаргасан томоохон шийдвэрийн талаар мэдээлжээ. 

800 мянга гаруй хүн амтай Бутан улсын 8679 багш, 4000 гаруй эмчийн цалин удахгүй нэмэгдэж, Бутаны хамгийн өндөр цалинтай мэргэжил болох аж. 

“Засгийн газраас өргөн дэвшүүлсэн цалингийн шинэ төсөл батлагдвал, багшийн ажил энэ улсын хамгийн өндөр цалинтай мэргэжил болно” хэмээн Ерөнхий Сайд мэдэгдэлдээ дурджээ. Бутаны эх сурвалжууд цалингийн нэмэгдлийн шалтгааныг эмнэлгийн ажилчид болон багш нарын стресс ихтэй ажлын нөхцөлтэй холбон тайлбарлаж байгаа юм. 

Бутан улс нь хэмжээт эрхт парламентын хаант засагтай. Засгийн газрын нийт орлого нь 407 сая доллар, зарлага нь 614 сая доллар. Төсвийн зарлагын 25 хувийг Энэтхэгийн Гадаад Хэргийн Яамнаас санхүүжүүлдэг байна. Парламентын 47 гишүүнийг сонгох сонгууль 5 жил тутам болдог бөгөөд дараагийн сонгууль 2023 онд болно. 

Эх сурвалж: IndianExpress.com