АНУ-ын Калифорни мужийн “ZeroAvia” компани устөрөгчийн урвалаар цахилгаан эрчим хүч гарган авдаг технологийг онгоцонд туршжээ. Зургаан хүний суудалтай зорчигч тээврийн уг онгоц нь дотоод шаталтын хөдөлгүүр ашиглалгүйгээр агаарт хөөрч нислэг үйлдсэн хамгийн том онгоц болж байгаа юм. Тус компани 2022 он гэхэд устөрөгчийн хөдөлгүүрийн хүчин чадлыг 20 хүний суудалтай онгоцны шаардлагад хүргэн нэмэгдүүлж, нислэгийн зайг 800км-т хүргэхээр зорьж байгаа аж.

Дэлхий даяар агаарын тээврийн салбар нь жилд 900 сая тонн нүүрсхүчлийн давхар ислийг агаарт ялгаруулж байгаа нь нийт ялгарч буй хүлэмжийн хийн 1.7-6.3 хувийг бүрдүүлдэг байна. 

“ZeroAvia”  компани нь хүлэмжийн хийн ялгарлыг бууруулах, байгаль орчинд ээлтэй агаарын тээврийн технологи нэвтрүүлэхээр ажиллаж буй хэд хэдэн амжилттай гарааны компаниудын нэг юм. Нэмэлт мэдээлэл хүргэхэд “ZeroAvia”-тай ижил төрлийн үйл ажиллагаа явуулдаг  “Ampaire” компани зарим онгоцны хөдөлгүүрийг хайбрид (цахилгаан+дотоод шаталт) болгож байгаа бол, “Eviation” компанийн хувьд 100 хувь батарейгаар ажилладаг онгоцыг бүтээхээр үйл ажиллагаа явуулж байна.

Эх сурвалж: Fast Company