Өнөөдөр БНХАУ-ын Шанхай хотноо эхэлсэн "Олон улсын хиймэл оюун ухааны хурал"-ын үеэр "Alibaba" группын үүсгэн байгуулагч Жак Ма, "Tesla" компанийн гүйцэтгэх захирал Элон Маск нар хиймэл оюун ухааны тухай үзэл бодлоо хуваалцсан нь олны анхаарлыг татлаа. 

Элон Маск хиймэл оюун ухаан нэг л өдөр хүмүүсийг "дэвсэлнэ" гэдэгт итгэдэг бөгөөд энэ бодлоо нуудаггүй. Тэрээр энэ удаагийн хуралд ч өөрийн байр сууриа бататган "Хиймэл оюун ухаан бүхий л талаараа хүмүүсийг гүйцэд түрүүлэх болно." гэжээ. Мөн "Хүмүүс бид юун түрүүнд тэнэг гэдгийг хүлээн зөвшөөрөх ёстой. Бид өөрсдөөсөө ч илүүг бүтээж чадахуйц бодлогогүй тэнэг амьтад" хэмээн ширүүхэн хэлсэн байна. 

Харин Хятадын тэрбумтан Жак Ма эсрэг байр суурьтай байгаагаа илэрхийлэв. Тэрээр "Би хэзээ ч хиймэл оюун хүнээс илүүрхэж, удирдана гэж төсөөлж байгаагүй. Энэ бол бүтэшгүй зүйл" гэжээ. Жак Ма цааш ярихдаа "Бид хиймэл оюун ухааны тусламжтайгаар долоо хоногийн гурван өдөр ердөө дөрвөн цагаар ажиллаж, хөдөлмөрөө хөнгөвчлөх боломжтой" хэмээн байр суурь дээрээ хатуу зогссон байна.

"Олон улсын хиймэл оюун ухааны хурал" энэ жил хоёр дахь удаа болж байгаа бөгөөд энэ сарын 31-нийг хүртэл үргэлжилнэ.