Өнөөгийн технологийн хөгжлийн чиг хандлага 2069 онд ямар түвшинд хүрч болохыг Samsung компани танилцууллаа. Тэд “Samsung KX50: The Future in Focus” (Бидний зорих ирээдүй) тайландаа  английн зургаан судлаачийн үнэлэлт дүгнэлтийг ашиглажээ.

Английн эзэн хааны инженерийн их сургуулийн инженер боловсролын тэнхимийн эрхлэгч Райс Морган, хүнсний ирээдүй судлаач Моргейн Гейл, дижитал эрүүл мэндийн ирээдүй судлаач Маниш Хунея, Английн эзэн хааны урлагийн их сургуулийн дизайн инженерчлэлийн инновацийн хүрээлэнгийн тусгай зөвлөх Дэйл Руссел, ирээдүй судлаач Матю Гриффин зэрэг салбарынхаа хүндтэй сэхээтнүүд дараах таамаглалуудыг гаргажээ:

• Амьдрах орчин: Хүмүүсийн нягтрал өндөртэй үлэмж том байшингуудад бид амьдарна. Уг байгууламжууд нь газрын доор, далайн гүнд ч байж болно. Харин бүгд өөрийн хэрэгцээний хүнсийг бүрэн үйлдвэрлэнэ.
   
• Тээвэр: Тав тухтай өөрийгөө жолоодогч машинууд бидэнд үйлчилнэ. Урт аяллын хугацаанд машины бүхээг зочид буудлын өрөөний үүргийг гүйцэтгэнэ.
   
• Хүнс: Амьтны гаралтай махны хэрэглээ буурч, тэмдэглэлт баярын өдрүүдэд хэрэглэдэг тансаг хүнс болно. Шавьжны гаралтай уургийн бүтээгдэхүүнүүд өргөн хэрэглээ болно.
   
• Аж үйлдвэрлэл: Хүнсийг хот дотор буюу хотын дэргэд үйлдвэрлэнэ. Аж үйлдвэрт 3D хэвлэлт нэвтэрч, хот нэг бүрийн хэрэглээг хангана.
   
• Ажил: Хиймэл оюун ухаан, автоматжуулалт өргөн хүрээнд ашиглагдана. Хүмүүс голчлон гэрээсээ ажиллана.
   
• Эрүүл мэнд: Хиймэл оюун ухаант туслахууд бидний эрүүл мэндийг цаг ямагт хянана.
   
• Энтертаймент: Virtual reality (хийсвэр бодит байдал) үүсгэх технологи цаашид хөгжинө. Тархинд шууд мэдээлэл дамжуулах технологи өргөн хэрэглээнд нэвтэрнэ.

2069 оныг төсөөлсөн уг тайлантай зэрэгцэн Samsung компани 2000 англи хүнийг хамруулсан судалгааг явуулжээ. Ирээдүйд гарч болох технологийн дэвшлүүдийг хүмүүст хамгийн их таалагдсанаар жагсаавал:

• 63 хувь: Өөрийгөө цэвэрлэгч гэр
• 43 хувь: Эрүүл мэндийн туслах
• 33 хувь: Нисдэг машин, 3D хэвлэгдсэн эд эрхтнүүд
• 20 хувь: Сансрын зочид буудал
• 17 хувь: Шавьж хүнс
• 9 хувь: Тархинд шууд дамжуулах энтертаймент

Эх сурвалж: New Atlas