Жингүйдлийн нөхцөлд барилгын цемент зуурч хатаасан анхны туршилтыг Олон улсын сансрын станц дээр амжилттай хийжээ. 

Эрдэмтэд трикалцийн силикат, чийглэсэн шохойн чулуу, нэрмэл ус зэрэг материалуудыг сансарт хөөргөж ердийн барилгын цементийг гарган авсан байна.

Сансрын цемент дэлхийнхээс ялгаатай. Дэлхийн татах хүч цементэд үйлчлэн агаарын бөмбөлгүүдийг арилгаж, давхаргат бүтцийг бий болгодог бол сансрынх жигд хатсан боловч дунд хэсэгтээ агаарын бөмбөлөг ихтэй байжээ. Энэ нь цементийн даац тэсвэрт нөлөөлөхийг эрдэмтэд дурджээ.

Цемент буюу түүнтэй ижил материалыг хүн төрөлхтөн 5000 жилийн туршид барилгад ашиглаж байна. Энэхүү судалгаа нь “Бичил татах хүчний нөхцөл дэх цементийн бэхжилт” нэртэй бөгөөд түүний үр дүнг хожмоо дэлхийгээс бусад орчинд хүний сууршлуудыг байгуулахад ашиглах юм.

Эх сурвалж: Astronomy