Машины мотор болон шатамхай түлшнээс ялгардаг хар нүүрсхүчил (black carbon)-ийн тоосонцрууд бүрэлдэн тогтож байгаа ургийн эхэс дотор хүрдэг болохыг Бельги улсын Хасселтын их сургуулийн эрдэмтэд илрүүлжээ. Хар нүүрсхүчил нь амьсгалын замын хүндрэл, зүрх судасны өвчин, хорт хавдар зэрэгтэй холбоотой байдаг аж.

Энэ судалгаа нь эхийн амьсгалах бохир агаар эхэсийн ханыг нэвтэлдэг болохыг харуулсан анхны судалгаа аж. 70 мянга гаруй оршин суугчтай Хасселт хотын тамхи татдаггүй 25 эхэд эрдэмтэд судалгаа хийжээ. Тэд ургийн эхэс доторх миллиметр куб бүрт хэдэн мянган тоосонцрын хэсэг байсныг илрүүлсэн байна.

“Ургийн бүрэлдэх үйл явц бол хүний амьдралын хамгийн эмзэг үе юм. Эрхтэний тогтолцоо бий болж байгаа энэ үеэр бохирдлоос зайлсхийх хэрэгтэй” хэмээн Хасселтын их сургуулийн профессор Тим Наврот хэлжээ. Агаарын бохирдол нь үр зулбалт, дутуу төрөлт, нярайн жингийн дутагдал зэрэгтэй холбоотой болох нь шинжлэх ухаанаар нэгэнт батлагдсан билээ.

Эх сурвалж: The Guardian