Долоо хоногт 40 цаг ажиллах нь ихэнх газрын тогтсон стандарт билээ. Тэгвэл дэлхий даяар ажлын цагийг бууруулж, амралтын цагийг нэмэгдүүлэх шилжилт явагдаж байна. Герман улсын үйлдвэрчний эвлэл ажилчдад зориулсан шинэ нөхцөлүүдийг амжилттайгаар хэрэгжүүлжээ.

Германы “IG Metal” нь цахилгаан хэрэгсэл, төмөрлөгийн үйлдвэрийн 900 мянга гаруй ажилчдыг нэгтгэсэн Европ тивд хамгийн томд тооцогдох үйлдвэрчний эвлэлүүдийн нэг юм. Үйлдвэрийн зүгээс анхлан ажилчдын цалинг 6,8 хувиар нэмэгдүүлэх санал тавьжээ. Үйлдвэрчний эвлэл хэлцлийн төгсгөлд:

• Цалинг 4,3 хувиар нэмэгдүүлэх;
• Нэг удаагийн цалингийн урамшуулал олгох;
• Ажлын цаг долоо хоногт 35 байсныг хоёр жилийн хугацаанд 28 болгон бууруулах

зэрэг эрхийг олж авсан байна.

Мөн ажилчид зөвхөн өөрсдийн ажилласан цагаар цалинжих боловч тэдэнд долоо хоногт 40 болон түүнээс дээш цаг ажиллах эрх нээлттэй байх ажээ.

Уг гэрээний талаар Франкфурт хотын эдийн засагч Адрэс Шүрлэ “Үйлдвэрчний эвлэл бүх шаардлагаа биелүүлж чадаагүй боловч олон ашигтай нөхцөлийг зөвшөөрүүлсэн” гэсэн бол хэлэлцээрт үйлдвэрүүдийг төлөөлсөн Стефан Вүлф “Олон үйлдвэрийн нуруун дээр хүнд ачаа нэмэгдлээ” хэмээн анхааруулжээ.

Герман улсын эдийн засаг сүүлийн жилүүдэд ажиглагдсан хамгийн хүчтэй үедээ байгаа юм. Тус улсын эдийн засгийн өсөлт 2011 оноос хойших хамгийн өндөр хэмжээндээ, ажилгүйдэл 1990 оноос хойших хамгийн бага түвшиндээ байгаа ажээ.

Эх сурвалж: The Telegraph