Өнгөрөгч долоо хоногт АНУ-ын Юта мужид болсон нэгэн ослын үеэр гал сөнөөгчид дуудлага аван очжээ. Тэд хэргийн газарт эмнэлгийн тусламж авч буй ээжийнхээ дэргэд айн цочирдсон бяцхан охиныг олж харсан байна.

Осолд ноцтой гэмтсэн хүн байгаагүй ч охин ихэд айсан байжээ. Түүнийг гартаа хумсны будаг атган зогсч байхыг анзаарсан хоёр гал сөнөөгч охинтой яриа өдөж, хумсаа будуулахыг хүссэн байна.

“Бидний хумсыг хэдхэн минут будаад л охин осолд орсноо мартах шиг болж, тайвширч эхэлсэн” хэмээн гал унтраах багийн дарга Аллэн Хадли, ахмад Кэвин Ллойд нар ярьжээ. Тэд өөрсдөө ч бага насны охидтой ажээ.

Гал унтраах аврах "Норт Дэвис" анги хоёр ажилтныхаа энэхүү санаачлагыг “Facebook” хуудас дээрээ хуваалцахад уг нийтлэл 19 мянган “like”, 5,8 мянган “share” авч олны анхаарлыг татсан байна.

Эх сурвалж: CBS News