Жил бүр болдог “Сарны аялал судалгаа шинжилгээний групп”-ын чуулга уулзалт саяхан болж өнгөрчээ. Энэ үеэр “NASA”-гийн эрдэмтэн Жон Коноли, Ники Вирхайзер нар сансрын агентлагийн саран дээр 2024 онд очих төлөвлөгөөг танилцуулсан байна.

Даалгаврын эхний шатанд “NASA” хоёр сансрыг нисгэгчийг сарлуу илгээхээр төлөвлөжээ. Тэд 6,5 өдрийг саран дээр өнгөрөөх бөгөөд энэ хугацаанд шинжлэх ухааны төрөл бүрийн ажиглалт туршилтыг хийх ажээ. “NASA”-гийн дэвшүүлж буй сарны зорилтод 2030 он гэхэд судалгаа хийх сансрын нисгэгчдийн тоог дөрөв болгох, даалгаврын хугацааг 14 хоног болгох, хүчилтөрөгч боловсруулах үйлдвэр байгуулах зэрэг зүйлс багтжээ.

Харамсалтай нь мэргэжилтнүүд уг төлөвлөгөөг хугацаандаа хэрэгжихгүй хэмээн таамаглаж байна. АНУ-ын конгресс уг төслийн төсвийг батлахгүй байгаа, Саранд хүргэх пуужингийн хөдөлгүүрийн үйлдвэрлэл төлөвлөгөөт хугацаанаасаа хоцорч байгаа, “Аполло” хөтөлбөрөөс хойших сансрын судалгааны төслүүд амжилтгүй болж байгаа зэрэг шалтгаануудыг ажиглагчид тодотгожээ.

Эх сурвалж: Ars Technica