“Microsoft”-ийн үүсгэн байгуулагч, тэрбумтан Билл Гейтс Хятадын Шанхай хотод болсон “Reinvented Toilet” үйл ажиллагааны үеэр хүний ялгадсыг бордоо болгон хувиргадаг ирээдүйн жорлон бүтээснээ танилцуулсан байна.

“Энэ шилэн хоргонд байгаа ялгадас 200 их наяд ротавирус, 20 тэрбум Шигела бактери, 100 мянган шимэгч хорхойн өндгийг агуулж буй аюултай зүйл” 

хэмээн тэр илтгэлээ эхэлж, ялгадсыг зөв устгалд оруулдаггүйгээс жил бүр таваас доош насны 500 мянган хүүхэд амь насаа алдаж байгааг дурджээ.

Тэрээр өөрийн эхнэр Мелинда Гейтсийн хамт удирддаг “Bill and Melinda Foundation” сангийн 2011 оноос хойш 200 сая ам.доллараар санхүүжүүлж буй ариун цэврийн технологийн судалгаа шинжилгээний үр дүнд бүтээсэн шинэ жорлонгоо олон нийтэд дэлгэсэн байна.

Уг жорлон усны асар их хэмнэлттэй, бохирын шугам сүлжээ шаарддаггүй бөгөөд химийн аргаар ялгадсыг задалж, бордоо болгон хувиргадаг ажээ. Билл Гейтс ойрын ирээдүйд үйлдвэрлэгчдэд уг төслөө танилцуулах бөгөөд шинэ жорлонгийн зах зээл 2030 онд 6 тэрбум ам.доллар хүрнэ хэмээн таамаглаж байна.

Эх сурвалж: AP, Reuters