Оюуны доройтол, тэнэгрэл, солиорол зэргийг агуулдаг Алцхаймерийн өвчин нь өндөр настнуудад түгээмэл тохиолддог өвчин юм. Зөвхөн АНУ-д л гэхэд уг өвчнөөр шаналж буй гэр бүлийн гишүүнээ асардаг 16,3 сая хүн байдаг ажээ.

Логан Вэлс хүүгийн эмээд зургаан жилийн өмнө Алцхаймер өвчний шинж тэмдэг илэрчээ. 79 хүрч буй өндөр настны өвчин жилээс жилд ужгирч, түүнд байнгын асаргаа шаардлагатай болсон байна. 

Эмээг асрахад Логаны гэр бүлээс гадна цөөнгүй асрагч ээлжилсэн нь мэдээллээ солилцоход хүндрэлтэй эмх замбараагүй байдлыг үүсгэж эхэлжээ.

Энэ үед 15 настай Логан Вэлс уг асуудлыг шийдэх апликейшн байх хэрэгтэйг олж харсан байна.

“Эмээтэй холбоотой хэдэн давхар групп чатыг унших нь хүмүүст үнэхээр хүндрэлтэй байсан”

хэмээн тэр олж харсан асуудлаа тайлбарлажээ.

Тэрээр компьютерийн код бичих сургалтад хамрагдаж, төд удалгүй аавтайгаа хамтран “CareZare” апликейшнийг гаргасан байна.

Уг апликейшн нь “Android” болон “iOS” үйлдлийн систем дээр үнэгүй бөгөөд асаргаа шаардлагатай хүний мэдээллийг түүний ойр дотнын хүмүүс нэг дороос авах, мэдээллийг шинэчлэх боломжийг олгодог байна.

Гэр бүлийнхээ асуудлыг шийдэх түүний шинэ санаа амжилт олж, апликейшнийг ойролцоогоор 600 гаруй гэр бүл ашиглах болжээ.

Эх сурвалж: Best Life