АНУ-ын Юта мужид оршин суудаг Сэми Паркинсон нэртэй залуу бүсгүй их сургуулийн хичээлээс түр чөлөө авч, хүмүүнлэгийн үйлсэд оролцох болжээ. Түүний аав Пол Паркинсон охиныхоо шийдвэрийг дэмжиж, хүүхдүүдийн гаргаж буй эерэг зөв санаачлалыг сурталчилсан ном бүтээх санал тавьсан байна.

Аав охин хоёр хамтарч “Тусч хүүхдүүд” зурагт номыг зохиосон бөгөөд түүнд Гүрж улсад нэгэн хүү өндөр настанг зам гарахад тусалснаас эхлээд Австрали эгч дүүс өөрсдийн үсийг хорт хавдрын өвчтөнүүдэд хандивлаж байгаа талаар олон түүх багтжээ.

“Эерэг сэтгэлгээ, сайн үйлийг биеэрээ үлгэрлэж байгаа олон хүүхдийн жишээнээс бусад хүүхдүүд төдийгүй томчууд ч өөрсдийгөө өөрчлөх урам зоригийг авах болов уу” 

хэмээн Пол номыг санаачлах болсон шалтгаанаа тайлбарласан байна.

Ном ердөө 96 хуудастай боловч дэлхий даяар амьдарч буй 40 хүүхдийн сайн үйлийн жишээг богино өгүүллэг, өнгөт зургийн хамтаар өгүүлжээ.

Эх сурвалж: Utah Public Radio