ОХУ-ын ерөнхий сайд Михайл Мишустин коронавирусын халдвараас сэргийлэх зорилгоор өөрийн улсын зүүн хязгаарын хилийг хаах тушаал буулгажээ.

"Хилийн боомтуудыг хааж байгаа нь хүн амын хөдөлгөөнийг хязгаарлах зорилготой бөгөөд бараа бүтээгдэхүүнд хамааралгүй "

хэмээн засгийн газраас нэмэлт тайлбар өгсөн байна.

Пүрэв гарагт баталсан уг тушаалын дагуу Орос-Хятадын хил дээр орших 25 боомтын 16 нь нэгдүгээр сарын 31-ний өдрийн 00:00 цагаас хаагдах болсон байна. Мөн ОХУ-ын Гадаад хэргийн яамнаас Хятадын иргэдэд цахим виз олгохоо зогсоожээ.

Орос улсад коронавирусын тохиолдол бүртгэгдээгүй байгаа бөгөөд тэд энэ долоо хоногийн эхээр хэсэг Хятад жуулчдыг гаалиар нэвтрүүлэхээс татгалзсан юм.

Эх сурвалж: The Moscow Times, Bloomberg