Коронавирусийн хөл хорионы үеэр Энэтхэг улсын агаарын бохирдол огцом буурч хойд Энэтхэгийн Punjab улсад 160 км-ийн чанадаас Гималайн уулсын бараа харагдаж эхэлсэн байна.

Энэтхэгийн Jalandhar хотын оршин суугчид гэрээсээ Гималайн нурууны оргилын зургийг дарж цахим орчинд нийтлэн сүүлийн гучин жил тохиогоогүй үзэгдэл болж буй талаар шуугьж эхэлжээ.

Коронавирусийн хөл хорионы үед үйлдвэрлэл зогсож, агаарын болон газрын тээврийн хэрэгслийн хөдөлгөөн эрс буурснаар сүүлийн хэдэн долоо хоногийн турш агаарын чанар үлэмж сайжирсан гайхамшиг тохиож буй талаар иргэд ам сайтай байна.

Энэтхэгийг агаар, орчны бохирдлыг хянах зөвлөлийн мэдээлснээр Дели хотын хувьд хөл хорио тогтоосон эхний өдөр гэхэд агаар дахь PM10 бохирдлын хэмжээ 44 хувиар буурсан үзүүлэлт гарчээ.

Тус байгууллагын тайлангаар Энэтхэгийн нийт 85 хот хөл хорио тогтоосон эхний өдөрт агаарын бохирдол мэдэгдэхүйц буурч эхэлжээ.

Дашрамд дурдахад дэлхийн агаарын чанарын IQAir AirVisual's 2019 тайлангаар агаарын бохирдлоороо дэлхийд тэргүүлдэг 30 хотын 21 нь Энэтхэг улсад байдаг байна.

Эх сурвалж: CNN