ОХУ-ын Ахмад дайчдын холбооны ахмадуудын уриалгаар тавдугаар сарын 9-ны "Ялалтын баярын парад"-ыг хойшлуулах талаар хэлэлцэж байна.  

ОХУ-ын Ерөнхийлөгчийн хэвлэлийн төлөөлөгч Дмитрий Песков "Ялалтын 75 жилийн ойн баяр болон Ялалтын парадыг заавал тэмдэглэн өнгөрүүлнэ. Бид баярыг тэмдэглэх тал дээр боломжит бүхий л хувилбарыг судалж байна. Хэнд ч энэ баярыг тэмдэглэх, үгүй дээр эргэлзэх хэрэггүй. Харин тавдугаар сарын 9-нд тэмдэглэх үү эсвэл хойшлуулах уу гэдгийг би мэдэхгүй байна" хэмээн дөрөвдүгээр сарын 10-нд өгсөн ярилцлагадаа дурьдсан.

Мөн тэрээр "Ялалтын баяр бол түүхийн томоохон илэрхийлэл. Одоогоор 20 гаруй орны төр засгийн тэргүүн энэ баярт оролцохоо илэрхийлсэн бөгөөд нөхцөл байдалтай холбогдуулан татгалзсан хариу өгөөгүй байна" гэв.

Харин тус улсын ахмад дайчдын холбооны ахмадууд эрсдэлээс сэргийлж, тавдугаар сарын 9-ны парадыг хойшлуулах уриалга гаргажээ. Тиймээс Орос улс Аугаа эх орны ялалтын 75 жилийн ойн баярын парадыг хойшлуулах талаар хэлэлцэж байна.