Коронавирусийн голомт болж, хөл хорио тогтоосон анхны хот болох Ухань эргэн хэвийн байдалдаа шилжсээр байна.  

Коронавирусийн анхны тохиолдол өнгөрсөн оны арванхоёрдугаар сарын дундуур Ухань хотод илэрсэн. Үүний дараах хэдэн долоо хоногийн хугацаанд тохиолдол улам нэмэгдэж, нэгдүгээр сарын 23-наас дөрөвдүгээр сарын 8-ны хооронд Хятадын засгийн газраас онцгой байдал зарлаж, хотод хөл хорио тогтоосон.  Энэ байдал Хубэй муж, Ухань хотуудад 76 хоногийн хугацаанд үргэлжилжээ. 

Гэвч тус улсын иргэд вирус дахин дэгдэхээс айж байна.

Харин одоо Ухань хот халдварын дэгдэлтийг хяналтандаа авсан бөгөөд Лхагва гарагт гаргасан хамгийн сүүлийн мэдээллээр тус хот, мужуудад шинэ тохиолдол, нас баралт нэмэгдээгүй байна. Хэдхэн долоо хоногийн өмнө гудамж талбайд цагдаагийн шалган нэвтрүүлэх цэгүүд ажиллаж байсан ч одоо бүх гудамж хэвийн хөдөлгөөнд шилжжээ.

Гэхдээ энэ нь иргэд хамгаалалтаа зогсоож, бүх хязгаарлалтыг цуцалсан гэсэн үг биш юм. 

Нэг талбайд олон хүн цуглуулахгүйн тулд дэлгүүр, кофе шопууд гадаа талбайдаа зогсож, худалдаа эрхэлж байна. Ингэснээр хүмүүсийн цугларалт үүсэхгүй дамжин өнгөрөх байдлаар худалдаа хийх боломжтой юм.