Сэлэнгэ аймгаас илрүүлсэн коронавирусийн халдвартай иргэнийг ХӨСҮТ-д тусгаарласан талаар ХӨСҮТ-ийн ерөнхий захирал Д.Нямхүү мэдээллээ. 

ХӨСҮТ-ийн ерөнхий захирал Д.Нямхүү "Дөрөвдүгээр сарын 08-нд Дорноговь аймгийн Замын-Үүд суманд нэг сэжигтэй тохиолдол бүртгэгдсэн. Нийт 38 шинжилгээ хийлээ. Сөүлээс ирсэн хүмүүст шинжилгээ хийж байна. Сэлэнгэ аймагт тусгаарлагдсан 9 иргэнд коронавирусийн халдвар илрээгүй. 

Сэлэнгэ аймагт батлагдсан тохиолдлыг ХӨСҮТ-д авчирч тусгаарласан. ХӨСҮТ-д өнөөдрийн байдлаар 205 иргэн тусгаарлагдаж, тандалт, шинжилгээнд хамрагдаж байна" гэв.

Мөн тэрээр "Монгол Улсын Шадар сайд Ө.Энхтүвшин өчигдөр бидний ажилтай танилцаж баяр хүргэж, урмын үг хэллээ. ХӨСҮТ-ийн голомтод ажиллаж буй 200 хүнд 500,000-1,000,000 төгрөгийн урамшууллыг өгөхөөр болсноо бидэнд мэдэгдлээ.

Эрүүл мэндийн сайд хэрэгцээтэй эм, урвалж, тоног төхөөрөмж, өрөөнүүдэд шаардлагатай засвар болон ажилтнуудын илүү цагийн мөнгийг хурдан шуурхай шийдвэрлэж өгсөнд ХӨСҮТ-ийн хамт олон талархал илэрхийлж байна" хэмээн онцолсон юм. 

212 орны 1,5 сая хүн коронавирусийн халдвар авчээ

ЭМЯ-ны Шуурхай удирдлагын газрын дарга Д.Нарангэрэл "Өнөөдрийн байдлаар 212 орны 1,5 сая хүн коронавирусийн халдвар авлаа. Өчигдөр Сөүл-Улаанбаатар чиглэлийн тусгай үүргийн онгоцоор 257 иргэн эх орондоо ирсэн. ДЭМБ-аас бид коронавирусийн халдвартай 100 гаруй хоног тэмцсэн байна. Хамгийн чухал нь дэлхий нийтээрээ эв нэгдэлтэй байж энэ өвчинтэй тэмцэж чадна хэмээн ДЭМБ-аас мэдэгдсэн" гэв.