Эрүүл мэндийн яамнаас коронавирусийн нөхцөл байдлын талаар мэдээлж байна. 

ХӨСҮТ-ийн ерөнхий захирал Д.Нямхүү "Өчигдөр Сонгдо эмнэлэгт сэжигтэй 2 тохиолдол бүртгэгдсэн бөгөөд түргэвчилсэн оношлуураар эерэг гарсан ч PCR-аар шинжлэхэд коронавирусийн халдвар илрээгүй нь батлагдлаа. Өнөөдрийн байдлаар ХӨСҮТ-д 245 хүн тусгаарлагдан, хяналт, ажиглалтад байна. Халдвар илэрсэн 25 хүний биеийн байдал тогтвортой байна" гэв. 

Халдвар илэрсэн 25 иргэний биеийн байдал тогтвортой байна

ЭМЯ-ны Шуурхай тандалт, судалгааны албаны дарга Д.Нарангэрэл "Ази тивийн хувьд Японд 24 цагийн дотор 480 тохиолдол бүртгэгдсэн байна. БНХАУ-д гаднаас халдварлан зөөвөрлөгдөн орж ирж буй учраас тусгаарлах хугацааг 28 хоног болгосон банйа. Манай орны хувьд батлагдсан 30 тохиолдол бүртгэгдсэн бөгөөд 5 хүн эдгэрсэн байна. Сүүлийн 24 цагийн байдлаар сэжигтэй тохиолдол бүртгэгдээгүй. Одоогоор сэжигтэй 1672 хүнийг тусгаарлан, ажиглаж байна" гэв.

ЭМЯ-ны Гадаад харилцааны хэлтсийн дарга Б.Янжмаа "Иран улсын хувьд ойрын хугацаанд бүртгэгдсэнээс хамгийн бага буюу 98 нас баралт бүртэгджээ. БНСУ-д тохиолдын тоо нэмэгдсээр байна. Тус улсад эдгэрээд гарсан иргэдийг дахин гэрт нь тусгаарлах арга хэмжээг авч эхэлжээ" гэв.