Эрүүл мэндийн яамны хэвлэлийн хурлын үеэр ХӨСҮТ-ийн ерөнхий захирал Д.Нямхүү монгол улсад коронавирусийн 35 дахь тохиолдол бүртгэгдсэн талаар мэдээллээ. 

ХӨСҮТ-ийн ерөнхий захирал Д.Нямхүү "Өчигдөр ХӨСҮТ-д 330 хүнд шинжилгээ хийсэн. Сөүл-УБ чиглэлийн тусгай үүргийн онгоцоор ирсэн 288 иргэнээс коронавирус илрээгүй. Тандалтаар хийсэн 25 шинжилгээнд халдвар илрээгүй байна. 

Дөрөвдүгээр сарын 21-нд батлагдсан тохиолдлын ойрын хавьтал болсон 23 хүний шинжилгээнд халдвар илрээгүй, харин 1 хүнд буюу халдвар илэрсэн тээврийн жолоочийн эхнэрээс коронавирус илэрлээ. Мөн нийт 8 хүн эдгэрээд байна" гэв. 

Тээврийн жолоочийн эхнэрээс коронавирус илэрлээ

ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл "Дэлхийн 213 орны 2.5 сая коронавирусийн халдвар авлаа. Сүүлийн 24 цагийн байдлаар манай  хойд хөршид 5000 гаруй шинэ тохиолдол бүртгэгдлээ. 3000 гаруй орчим тохиолдол нь Москва хотод бүртгэгдсэн аж. 

Мөн тус улсын Эрүүл мэндийн яамныхан зүрх судасны өвчлөлтэй иргэд  өртөх магадлалтай хэмээн үзжээ. 119 дугаарт 226 дуудлага ирсний дийлэнх нь буюу 70 хувь нь өсвөр насны хүүхдүүд амны хаалтгүй гадуур их явж байна гэсэн дуудлага иржээ" гэв.

ЭМЯ-ны Гадаад харилцааны хэлтсийн дарга Б.Янжмаа "Сингапур улсад сүүлийн 3 хоногт 3000 гаруй халдварын тохиолдол бүртгэгджээ. Үүнтэй холбогдуулан сургууль, цэцэрлэгийн үйл ажиллагааг зогсоож, хөл хориог зургадугаар сарын 1-н хүртэл сунгажээ. 

Халдварын эсрэг вакцин гараагүй энэ үед хөл хориог сулруулах нь халдвар тархах эрсдлийг нэмэгдүүлж байна хэмээн ДЭМБ-аас мэдээлсэн" гэв.