ЭМЯ-наас коронавирусийн халдварын нөхцөл байдлын талаар мэдээлж байна. 

ЭМЯ-ны хэлтсийн дарга Д.Нарангэрэл "Дэлхийн 201 оронд өвчлөл бүртгэгдсэн байна. Халдварын хоёр дахь давалгаанд 10-45 насныхан өртөж байна" гэв.

Улсын Онцгой комиссын шийдвэрээр тусгаарлах хугацааг 21 хоног болгосон. 

ЭМЯ-ны Эмнэлгийн тусламжын газрын дарга Я.Буянжаргал "Өнөөдрийн байдлаар 2216 иргэн тусгаарлалт, ажиглалтад байна. Өчигдөр УОК-ын шийдвэрээр тусгаарлах хугацааг 21 хоног болгосон. Тусгай үүргийн онгоцоор ирж буй иргэдийг тухайн байгаа улсад нь шинжилгээнд хамруулах бөгөөд халдвар илрээгүй тохиолдолд, халуурах, ханиалгах шинж тэмдэггүй тохиолдолд онгоцонд суулгана. Халдвар манай улсад тархах эрсдэл маш өндөр байгааг эрдэмтэн, судлаачид анхааруулсаар байна" гэв. 

ХӨСҮТ-ийн ерөнхий захирал Д.Нямхүү "Токио-Улаанбаатар чиглэлийн тусгай үүргийн онгоцоор ирсэн 96 хүнээс халдвар илрээгүй. Халдвартай иргэдтэй ойрын хавьтал болсон 71 иргэнээс мөн халдвар илрээгүй. Тусгай үүргийн онгоцоор ирсэн иргэдийн шинжилгээг ээлж дараатайгаар шинжилж байна.

Гуравдугаар сарын 25-нд ХӨСҮТ тусгаарлагдсан нэг сэжигтэй тохиолдлоос ч мөн COVID-19 илрээгүй. Халдвартай иргэдийн биеийн байдал тогтвортой байна гэсэн сайн мэдээ байна" гэв.