ХӨСҮТ-ийн Тандалт судалгааны албаны дарга А.Амбасэлмаа "Зургаадугаар сарын 1-ний өдөр нийт 212 хүнд шинжилгээ хийхэд коронавирус илрээгүй" хэмээн мэдээллээ. 

Мөн тэрээр "Дээрх 212 хүний шинжилгээг дотор нь задалж хэлбэл,

• Тандалтын зорилгоор гурван хүнээс шинжилгээ авахад,
• ХӨСҮТ-д тусгаарлагдсан найм,
• Ажиглах байранд тусгаарлагдсан нэг хүний давтан шинжилгээ
• Истанбул-Улаанбаатар чиглэлийн онгоцоор ирсэн зорчигчдод шинжилгээ хийхэд коронавирус илрээгүй. Бид олон улсын зөвлөмжийн дагуу 7, 14 хоногийн давтамжтайгаар шинжилгээ хийж байна" гэв.

ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл "Өнөөдрийн байдлаар дэлхийн 216 орны 6.3 сая хүн коронавирусийн халдвар авч, 2,9 сая хүн эдгэрчээ. 119 тоот дугаарт 187 дуудлага ирж, урьдчилан сэргийлэх зөвлөгөө авчээ" гэв.  

ЭМЯ-ны Гадаад харилцааны хэлтсийн дарга Б.Янжмаа "АНУ, Бразил, ОХУ халдварын тоогоор тэргүүлсэн хэвээр байна. АНУ 1,8 сая хүн халдвар авч, 104 мянган хүн эндсэн байна. Бразил улсад 12 мянга гаруй халдвар бүртгэгдэж, нийт тохиолдлын тоо 529 мянгад хүрчээ. 

Энэтхэг улсад 8000 гаруй шинэ тохиолдол бүртгэгдэж, нийт тохиолдлын тоо 198 мянга давлаа. БНХАУ-д гаднаас зөөвөрлөгдөн орж ирсэн 5 тохиолдол бүртгэгдсэн аж" гэв.