Монголын маркетеруудын өдөр аравдугаар сарын 20-нд буюу энэ ням гарагт болох гэж байна. 

Өнгөрөгч оны аравдугаар сарын 31-ний өдөр Монгол Улсын Засгийн Газрын тогтоолоор жил бүрийн энэ өдрийг “Маркетеруудын Өдөр” болгон зарлажээ.

Энэ жилээс уг өдрийг албан ёсоор тэмдэглэж буйтай холбогдуулан “Манай маркетерууд” сэдэвт фэйсбүүк сэлфи уралдааныг аравдугаар сарын 17-19-ний өдөр хүртэл зарлаж байгаа аж. 

Үүнд байгууллагын Маркетинг болон борлуулалтын албаны ажилчид баг хамт олноороо сэлфи хийж “Монголын Үндэсний Маркетингийн Холбоо” пэйж хуудас дээр байршуулан хамгийн олон хандалт авсан зургийг шалгаруулан өргөмжлөл, тусгай шагналаар шагнах юм.

Мөн “10/20 Монгол брэндүүд бүтсэн түүх” номыг гаргахаар бэлтгэж байгаа бөгөөд уг номонд өөрийн брэндийг оруулах хүсэлтэй аж ахуй нэгж байгууллага бүхэн оролцох боломжтой. 

“Монголын Үндэсний Маркетингийн Холбоо” ТББ нь маркетингийн салбарыг хөгжүүлэх, маркетеруудын ур чадварыг нэмэгдүүлэх, дэлхийн түвшинтэй эн зэрэгцэх мэргэжилтэнг бэлтгэх зорилгоор 2013 оноос эхлэн үйл ажиллагаа явуулж байгаа билээ.

Монголын бүх маркетерууддаа, “Монголын Маркетеруудын өдрийн” мэнд хүргэе!