Засгийн газрын хэрэг эрхлэх газрын дарга Л.Оюун-Эрдэнэ Хөгжлийн банкнаас авсан зээлээ төлөөгүй компаниудыг прокурорт өгч байгаа талаар өнөөдөр мэдээлэл хийлээ.

Тэрбээр ЗГХЭГ-аас  Улсын Ерөнхий прокурорт хандан хоёр албан бичиг явуулж байна. Хөгжлийн банкнаас авсан их хэмжээний зээлээ графикийн дагуу хугацаанд нь төлөөгүй гэж үзэж “Эрэл”, “Хөтөл” ХК, “ТОСК” ТӨХК, “Монгол драй милк”, “Капитал банк”-ийг прокурорын байгууллагад өгч байгаа юм байна.

Төрд учирсан хохирлын араас хэн хөөцөлдөх вэ гэдэг нь эргэлзээтэй буюу нэг ёсондоо "эзэнгүй" байсаар ирсэн. Энэ чиг үүргийг одоогийн байдлаар прокурорын байгууллага хариуцдаг гэх. Хууль байгаа ч хэрэгжихгүй байна. Тэгвэл Хөгжлийн банкны зээлийн асуудлаар Засгийн газраас анх удаа хууль хяналтын байгууллагад хандаж буй нь энэ юм. 

ХУГАЦАА ХЭТЭРСЭН НИЙТ ЗЭЭЛИЙН ХЭМЖЭЭ:

• “Хөтөл” компани-270.6  тэрбум

• "Төрийн Орон Сууцны Корпораци"-199.5 тэрбум

• "Эрэл" компани-86.1 тэрбум

• “Монгол драй милк”-47.7 тэрбум

• “Кью эс си”   ХХК-186.1 тэрбум

• “Капитал банк”-57.9 тэрбум