Нийслэлийн Мэргэжлийн хяналтын газар, Онцгой байдлын газар, Агаарын бохирдолтой тэмцэх газраас угаарын хийн хордлогын талаар мэдээлэл хийлээ.  

Нийслэлийн хэмжээнд өчигдөр өглөөний 06.00 цагаас өнөө өглөөний 06.00 цагийн байдлаар 17 өрхийн 34 иргэнээс угаарын хийн дуудлага ирсэн байна. Үүний 18 нь том хүн, 16 нь хүүхэд. Эмнэлэгт 9 том хүн, 3 хүүхэд хэвтэн эмчлүүлж байна, биеийн байдал хэвийн байгаа гэдгийг ОБЕГ-аас мэдээллээ.  

Ойрын өдрүүдэд эрс хүйтрэх гэж байгаатай холбогдуулан иргэд хэдийгээр шинэ нөхцөлд галлагаа хэрэглэж байгаа ч гэсэн хувийн өвөлжилтийн бэлтгэлээ сайн хангах зайлшгүй шаадлагатай. Гэр хорооллын өрхүүдийн дийлэнх нь ханан пийшин ашигладаг. 

Олон жил хэрэглэснээс үүдэн зуух хуучирч ан цав үүссэн, битүүмжлэл муутай, зай завсар ихтэй мөн яндангийн сойлт хийсэн зориулалтын хавхлагыг авч хаясан, янданг хэт намхан хийсэн, сайжруулсан түлшээ хэтрүүлэн галладаг, үнс ихтэй байгаагаас угаарын хийнд хордох эрсдэл өндөр байгаа тул зуухныхаа битүүмжлэлийг сайжруулахыг анхаарууллаа.