Өчигдөр улсын их хурлын чуулганаар Хорт хавдрыг эрт илрүүлэх, урьдчилан шинжилгээнд хамруулах хуулийн төслийг баталсан талаар УИХ-ын гишүүн Д.Дамба-Очир мэдээлэл хийлээ. 

“Хорт хавдраар жилд 4400 хүн нас барж байна. 3 сая гаруй хүн амтай манай орны хувьд энэ үзүүлэлт бол гамшгийн хэмжээнд ирсэн гэсэн үг. Энэ хууль гарснаараа 21 аймаг, 6 дүүрэгт хорт хавдрын урьдчилан сэргийлэх боломж нь гарч ирэх юм. Өөрөөр хэлбэл тоног төхөөрөмжүүдийг дээрх газруудад тавьж 7 төрлийн хорт хавдрыг илрүүлнэ” гэж тэрбээр мэдэгдэв. 

Улсаас оношлогооны тоног төхөөрөмжид 39,4 тэрбум төгрөгийг төсөвлөжээ. Ингэснээр иргэд бүтэн жилийн турш шинжилгээнд хамрагдах боломжоор хангагдана гэдгийг гишүүн нэмж хэлэв.

Энэ хууль 2020 оны нэгдүгээр сарын 1-нээс хэрэгжиж эхлэх аж.