Монгол Улсын Үндсэн хуулийн цэцийн дарга Д.Одбаяр болон түүнтэй хамт явж байсан 42 настай Монгол Улсын иргэн А нарыг БНСУ-ын Инчоны орон нутгийн шүүхээс баривчлан байцаалт авах шийдвэр гаргасан талаар тус улсын Naver News сайт мэдээллээ. 

Гэмт хэрэг үйлдсэн нь тодорхой болсон, оргон зугтах магадлалтай үед Цагдаагийн байгууллагын саналыг үндэслэн шүүхээс баривчлах шийдвэр гаргадаг.

Инчон хотын цагдаагийн газраас Сингапур Улс руу мэдүүлэг өгөлгүй явсан А-г Монгол Улсаас БНСУ-д суугаа ЭСЯ-аар дамжуулан албадан ирүүлэх арга хэмжээг авахаа мэдэгдсэн байна.

Эргэн сануулахад Үндсэн хуулийн цэцийн дарга Д.Одбаяр “Korean air” компанийн онгоцны үйлчлэгч бүсгүйн биед халдаж, бэлгийн дарамт үзүүлсэн хэрэгт холбогдсон. Түүнийг даваа гарагт түр саатуулсан ч дархан эрхийг нь үндэслэн сулласан билээ. Индонез руу албан ажилтай явж байсан Д.Одбаярыг БНСУ-д эргэн ирж мэдүүлэг өгөхийг шаардсан юм.

Эх сурвалж: Naver News