Өчигдөр ерөнхий сайд У.Хүрэлсэх академич Б.Бямбаагийн бүтээлийг үнэлэн, “Технологийн дэвшлийн шагнал”-аар шагнан, 100 сая төгрөгийг гардуулсан. Академич Б.Бямбаагийн шагнал хүртсэн “Паразиттах өвчтэй малыг эмчлэх, сэргийлэх дэвшилтэт технологи” бүтээлийн таван үр дүнг танилцуулъя.

1. “Паразиттах өвчтэй малыг эмчлэх, сэргийлэх дэвшилтэт технологи” бүтээл нь “Мал эмнэлгийн хүрээлэн”-д сүүлийн 20 гаруй жилийн хугацаанд хийсэн эрдэм шинжилгээ, туршилт, зохион бүтээх ажлын үр дүн юм.

2. Энэ бүтээл нь мал сүргийг паразиттах өвчнөөс сэргийлэх, паразит, зооноз, бэтэг, финоз зэрэг аюулт өвчнөөс хүн амыг хамгаалах, төрөөс үндэсний үйлдвэрлэлийг сэргээн хөгжүүлэх, импортын барааг орлох бүтээгдэхүүний үйлдвэрлэлийг нэмэгдүүлэх талаар баримталж буй бодлогыг хэрэгжүүлэхэд үр нөлөө үзүүлсэн хэмээн дүгнэжээ.

3. Малын гадар, дотор паразитыг устгах, сэргийлэх үйлчилгээтэй Авермонмек, цагаан хорхойг малын биеэс гадагшлуулан, туулгах үйлчилгээтэй Альмонзол эм бэлдмэлүүд үйлдвэрлэлд нэвтэрч, дотооддоо үйлдвэрлэх болсноор гадаадын ижил төстэй бүтээгдэхүүн худалдаж авах үнэтэй харьцуулахад 147.4 тэрбум төгрөгийн хэмнэлтийг хийсэн гэж эдийн засагчид тооцоолсон.

4. Олон найрлагат эм бэлдмэлийг зохион бүтээх орчин үеийн технологи, техник хэрэгсэл, “ноу-хау”-г ашигласнаараа хүн ам, байгаль орчинд сөрөг нөлөөгүй, экологийн хувьд цэвэр технологи болжээ.

5. Энэ бүтээлээрээ 2006 онд Дэлхийн оюуны өмчийн байгууллагын алтан медалийг хүртсэн аж.