Шинэ коронавирусийн оношлуурыг өчигдөр Япон улсаас хүлээн авсан талаар Эрүүл мэндийн яамнаас мэдээллээ.  

Коронавирусийн халдвар яригдаж эхэлснээс хойш Хятадын эрдэмтэн, судлаачид ДНХ-ийн нуклеотидийн дарааллыг тогтоох дээр маш эрчимтэй ажилласан. SARS-ийн халдвар гарч эхэлсэн үед  дарааллыг тогтооход дөрвөн сар гаруйн хугацаа зарцуулсан гэдэг.

Эрүүл мэндийн яамны Төрийн захиргаа удирдлагын газрын дарга Б.Цогтбаатар "Мөн Шинэ коронавирусийн нуклеотидийн дарааллыг 20 орчим хоногийн дотор хятадын эрдэмтэд тогтоосон. Үүний үр дүнг ДЭМБ болон бусад улсын эрүүл мэндийн байгууллагатай хуваалцаж, оношлуурыг хийж эхэлсэн" гэв.

Өнөөдрийн хувьд бид 200 оношлуурыг хүлээн авсан. Цаашид БНХАУ-д хийсэн оношлуурыг авч хэрэглэх талаар ярилцаж байна.

Түүнчлэн өмнө нь манай улсад дөрвөн төрлийн коронавирусийн халдварыг илрүүлж байсан. Тэдгээр нь нутагшмал тархалттай байсан учраас бид байнга томуугийн тогтолцооны нэг хэсэг болгон оношилж байгаа.

Зарим хүмүүс өнөөдөр аппарат тоног төхөөрөмж авлаа гэж буруу ойлгож байна. Аппаратын хувьд ХӨСҮТ-ийн лавлагаа лабораторид бэлэн байсан. Бодит хугацааны PCR буюу Полимеразийн гинжин урвалыг аппаратаар үздэг.

Харин эдгээр оношлуурыг хүлээж авснаар Хонг Конгоос халуунтай ирсэн хоёр хүний шинжилгээний хариу урьдчилсан байдлаар гарах боломжтой болсон хэмээн онцлов.