Хятадын цагаан сараас хойш БНХАУ-аас 5800 гаруй Монгол иргэд эх орондоо ирсэн бөгөөд өчигдөр Эрээнд байгаа 1500 гаруй иргэд хүсэлт гаргажээ.

ГХЯ-ны Консулын газрын захирал Л.Мөнхтүшиг "ГХЯ-ны яам хилийн чанадад байгаа монгол иргэдийнхээ аюулгүй байдлыг хангах, вирусийн халдвараас урьдчилан сэргийлэх чиглэлээр бүх улсад байгаа ЭСЯ-дад чиглэл өгч ажиллаж байна. 

Өнөөдрийн байдлаар БНХАУ-д байгаа ЭСЯ, Консулын газрууд халдварын голомтоос өөр бүсэд байгаа эх орондоо буцах хүсэлтэй иргэдийг бүртгэж байна. БНХАУ-ын Цагаан сараас хойш 5800 орчим иргэн эх орондоо ирсэн. Өчигдөр Гашуунсухайт, Шивээхүрэн боомтоор 100 орчим иргэн ирсэн бол өнөөдрийн байдлаар Эрээнд байгаа 150 орчим иргэн эх орондоо ирэх хүсэлтээ гаргасан байна. 

Мөн гадаадад байгаа иргэддээ хандаж хэлэхэд ЭСЯ болон Консулын газартаа заавал бүртгүүлээрэй. Аливаа асуудал гарахад бүртгэлтэй иргэдтэй холбогдоход хялбар бөгөөд шуурхай байдаг" хэмээн онцоллоо. 

ДЭМБ-ын мэргэжилтэн О.Ариунтуяа "Сүүлийн 24 цагт халдвар нэмж бүртгэгдсэн тохиолдол гарсангүй. БНХАУ-аас гадна 23 улсад халдвар бүртгэгдээд байгаа бөгөөд тэдгээр улсуудад шинээр бүртгэгдсэн долоон хүн бүгдээрээ БНХАУ-д зорчсон байна" гэв.

ХӨСҮТ-ийн захирал "Манай орон коронавтирусийн 200 оношлуурыг өнгөрсөн сарын 27-нд Япон улсаас авсан бөгөөд одоогоор 100 оношлуур үлдсэн байна. ДЭМБ-аас 3000 оношлуур авахаар захиалга өгсний эхний ээлж ирэх долоо хоногт ирнэ"гэв.