Засгийн газрын хуралдаанаар Мэргэжил сургалт үйлдвэрлэлийн төвийн оюутнуудад сар бүр 200 мянган төгрөгийн тэтгэлэг олгох шийдвэрийг гаргалаа. 

Ингэхдээ МСҮТ-ийн 2.5 жил, нэг жилийн өдрийн анги, техникийн боловсрол эзэмшүүлэх гурван жил, 1.5 жилийн өдрийн ангид суралцагч, ажил олгогчийн захиалгаар 4-6 хүртэл сарын сургалтад хамрагдаж байгаа 45 хүртэл насны суралцагч авах юм. Гэхдээ сургуулийн дотоод журам болон ёс зүйн дүрэм зөрчөөгүй, тухайн сарын онол, дадлагадаа 75-аас дээш хувийн ирцтэй байх ёстой аж. 

Өмнө нь Засгийн газрын хуралдаанаар 70 мянган төгрөг байсан тэтгэлгийг 2019 онд 100 мянга болгон нэмж байжээ.

Сангийн сайд Ч.Хүрэлбаатар 2019 оны есдүгээр сард 2020 оны улсын төсвийг танилцуулах үеэрээ Мэргэжлийн сургалт үйлдвэрлэлийн төвийн суралцагчдад 200 мянган төгрөгийн тэтгэлэг авдаг болгохоор тусгасан талаараа мэдээлж байсан юм.