Засгийн газраас хоёрдугаар сарын 13-наас буюу өнөөдрөөс "Гамшгаас хамгаалах өндөржүүлсэн бэлэн байдлын зэрэгт" шилжүүлсэн. 

Засгийн газрын 2020 оны 02 дугаар сарын 12-ны өдрийн 62 дугаар тогтоолын хэрэгжилтийг хангах, шинэ кронавирусийн халдвараас урьдчилан сэргийлэх, эрсдлийг бууруулах, бэлэн байдлыг хангах зорилгоор нутаг дэвсгэрийн нэгж, төрийн болон нутгийн захиргааны байгууллага, гамшгаас хамгаалах улс, орон нутгийн алба, хуулийн этгээдүүд дараах арга хэмжээг авч ажиллана. Үүнд:

- Гамшгаас хамгаалах төлөвлөгөөнд тодотгол хийх, шуурхай штаб байгуулах

- Гамшгаас хамгаалах улсын болон орон нутгийн албадыг ажлын тусгай горимд шилжүүлэн ажиллах.

- Коронавирусийн халдвар бүртгэгдсэн тохиолдолд хорио цээрийн дэглэмийг тогтоох.

- Гамшгаас хамгаалах мэргэжлийн ангийн хүч хэрэгслийг томилгоожуулан бэлтгэл, бэлэн байдлыг хангах.

- Урьдчилан сэргийлэх, мэдээ мэдээллийг хэвлэл мэдээллийн бүх хэрэгслээр иргэдэд шуурхай, хүртээмжтэй хүргэх.

- Сар шинийн байртай холбоотой бараа бүтээгдэхүүний зар сурталчилгааг хэвлэл мэдээллийн хэрэгсэл болон бусад хэлбэрээр түгээхийг зогсоох.

- Хүнс, барааны үзэсгэлэн худалдаа зохион байгуулахыг хориглох.

- Хот хоорондын нийтийн тээврийн хэрэгслээр зорчиж буй иргэдийн эрүүл мэндийн байдалд хяналт тавих.

- Тээврийн хэрэгсэлд халдваргүйжүүлэлт хийх.

- Баар, ресторан, нийтийн хоолны газар болон үзвэр үйлчилгээний газрын ажлын цагийн хуваарьт хязгаарлалт хийх.

- Бараа, үйлчилгээний үнийн хөөрөгдөл, зохиомол хомсдол үүсгэхгүй байх.

- Шашны байгууллагуудын шашин номын хурал цуглаан, зан үйлд иргэд, олон нийтийг оролцуулахгүй байх.

- Амьсгалын замын цочмог халдвар, томуу, томуу төст өвчнөөр өвчилсөн 5 хүртэлх насны хүүхдээ эмнэлэгт эсхүл гэртээ асарсан эцэг, эх асран хамгаалагчид 5 хүртэлх хоногийн цалинтай чөлөө олгохоор шийдвэрлэлээ.

ОБЕГ-ын дэд дарга, хурандаа Ц.Ганзориг "Засгийн газраас шийдвэрийн дагуу улсын хэмжээнд засаг захиргаа, нутаг дэвсгэрийн нэгж, төрийн болон нутгийн захиргааны байгууллага, хуулийн этгээдийг 2020 оны хоёрдугаар сарын 13-наас эхлэн “Гамшгаас хамгаалах өндөржүүлсэн бэлэн байдлын зэрэгт” шилжүүлсэн гэв.