Засгийн газрын хуралдаанаар БНХАУ Монгол Улсын хоорондох нислэг, төмөр замын зорчигч тээврийг бүрэн зогсоох шийдвэрийг гаргалаа. 

Энэ талаар Засгийн газрын Хэвлэл мэдээлэл, олон нийттэй харилцах хэлтсийн дарга Ц.Ганзориг "Сүүлийн 14 хоногийн хугацаанд нийт 6000 монгол иргэн урд хөршөөс эх орондоо ирсэн. Маргаашнаас эхлэн хилийг 100 хувь хаана гэсэн үг.  Агаарын болон төмөр замын тээврээр аль ч улсын иргэнийг нэвтрүүлэхгүй. Монгол Улсын иргэд хүндэтгэх шалтгаан байвал тухайн үед Консулын газрууд ажиллан чартер нислэгээр авчирна" хэмээн хэлэв. 

Агаарын тээвэр болон төмөр замын зорчигч тээврийг бүрэн зогсоож байгаа бөгөөд БНХАУ-ын иргэдийг нэвтрүүлэхгүй, Монгол Улсын иргэд гуравдагч орон руу ч зорчих боломжгүй болж байгаа юм. 

Мөн Замын-Үүд, Буянт-Ухаа, Гашуунсухайтын боомтуудыг хаах шийдвэр гаргасныг мэдээллээ. Өөрөөр хэлбэл БНХАУ-тай хиллэж буй боомтуудыг бүрэн хааж байгаа юм байна.