Эрүүл мэндийн яамнаас иргэдийг айдас, түгшүүрт автаж дархлаагаа сулруулж болохгүй. Үнэн бодит мэдээлэлд итгээрэй хэмээн зөвлөлөө. 

Хэвлэлийн хурлын эхэнд Эрүүл мэндийн яамны хэлтсийн дарга Д.Нарангэрэл “Өнөөдрийн 00:25 цагт коронавирусийн халдварыг дэлхий нийтийг хамарсан цар тахал гэж ДЭМБ-аас зарлалаа. Сүүлийн 100 жилийн хугацаанд нийт дөрвөн цар тахал бүртгэгдсэн. Энэ удаагийн цар тахал коронавирусээр үүсгэдэж байгаа анхны цар тахал бөгөөд хяналтад авч чадсан гэдгээрээ онцлог байна. Дэлхийн улс орнууд, олон улсын байгууллагууд энэ өвчний эсрэг тэмцэлд нэгдэн оролцоно" гэв. 

ДЭМБ-аас эрсдэлт бүлгийг 60-аас дээш насныханыг хамруулж байсан бол өнөөдрөөс 40-өөс дээш насныханыг эрсдэлт бүлэгт хамруулж эхэлсэн аж. 

Франц иргэнтэй ойрын хавьтал болсон 126 иргэнээс коронавирусийн халдвар илрээгүй

ЭМЯ-ны Эмнэлгийн тусламжийн газрын дарга Я.Буянжаргал "Халдвар илэрсэн Франц иргэний биеийн байдал хүндэвтэр байна. Эмчилгээ хэвийн үргэлжилж байгаа бөгөөд тухайн иргэнээс ямар нэгэн санал, гомдол ирээгүй. Бид өнөөдөр 15:00 цагаас Уханьд ажиллаж буй эмч нартай онлайн хурал зохион байгуулна. 

ХӨСҮТ-ийн ерөнхий захирал Д.Нямхүү "Франц иргэнтэй нэгдүгээр хавьтал болсон 126 иргэний шинжилгээний хариу сөрөг буюу коронавирусийн халдвар илрээгүй. Мөн Увс аймагт тусгаарлагдсан Англи иргэний шинжилгээний сорьцыг Увсаас Улаанбаатар руу авчирч байгаа. Тухайн иргэнээс одоогийн байдлаар ямар нэгэн шинж тэмдэг илрээгүй" гэв.