Коронавирусийн халдвар авсан нь тогтоогдсон Франц иргэнтэй нэгдүгээр хавьтал болсон 149 иргэний шинжилгээний хариу сөрөг гарсан бөгөөд онгоцонд түүний хажууд суусан гэх Англи иргэнийг Увс аймагт тусгаарлаад буй билээ. 

Эрүүл мэндийн яамны 11:00 цагийн хэвлэлийн хурлаар 126 иргэнээс коронавирусийн халдвар илрээгүй хэмээн мэдээлсэн бол 15:41 цагийн байдлаар нэмж, 23 иргэний хариу гарч нийт 149 иргэний шинжилгээний хариу сөрөг буюу коронавирусийн халдваргүй нь тогтоогдсон юм. 

Эдгээр иргэдэд 7, 14, 21 хоногийн давтамжаар дахин шинжилгээнл хамруулах бөгөөд ХӨСҮТ-д тусгаарлан ажиглаж байна. 

Тэгвэл Англи иргэний шинжилгээний сорьц өнөөдөр 17:00 цагт ХӨСҮТ-д ирсэн бөгөөд шинжилгээний хариу маргааш гарах аж. 

"Их Британийн иргэний биеийн байдал одоогоор хэвийн бөгөөд, халуурах зэрэг эмнэлзүйн шинж тэмдэг илрээгүйг ХӨСҮТ-өөс мэдэгдлээ" хэмээн Засгийн газрын хэвлэл мэдээлэл, олон нийттэй харилцах хэлтсээс мэдээллээ.